12 aprel 2021-ci il tarixində Qəbələ Uşaq və Ailələrə Dəstək Mərkəzinin (UADM) və Qəbələ rayon İcra Hakimiyyətinin birgə  təşkilatçılığı ilə “İntihar çıxış yolu deyil” adlı  onlayn görüş keçirilib.

Görüşdə Qəbələ UADM-nin sosial iş üzrə mütəxəssisləri, Qəbələ RİH-in nümayəndəsi Anar Şirinov, rayon İcra Hakimiyyəti yanında uşaqlarla iş üzrə məsləhətçi psixoloq Mələkxanım İsayeva, kənd icma ərazi nümayəndəsi, İsmayıllı UADM-nin psixoloqu Ülkər Məhərrəmova, Gənclər və İdman İdarəsinin rəhbəri Fəxri Soltanov, məktəb müəllimləri və psixoloqları  iştirak edib.

Görüş  zamanı intihar  hallarının  qarşısını almaq  üçün ailə, məktəb, cəmiyyət  və dövlət səviyyəsində məqsədyönlü  tədbirlərin  görülməsindən danışılıb. Müzakirə zamanı intihara cəhd edənlər üçün psixoloji dəstəyin vacibliyi qeyd edilib və bildirilib ki,  psixi pozuntularla bağlı güclü sarsıntı yaşayanlar psixiatr və psixoloqlara vaxtında müraciət etməlidir.

Görüşdə uşaq və gənclərin asudə vaxtının səmərəli  təşkil edilməsinin  önəmi və  onların maraqlandıqları sahələr üzrə məşğuliyyətə cəlb edilməsinin əhəmiyyəti xüsusilə qeyd edilib.

Sonda iştirakçılara maarifləndirici  bukletlər təqdim edilib.