Qubadlı şəhərinin işğaldan azad olunmasının ildönümü münasibətilə regionlarda tədbirlər keçirilib
25 oktyabr 2021-ci il tarixində Qubadlı şəhərinin işğaldan azad olunması münasibətilə Ailə, Qadın və Uşaq Problemləri üzrə Dövlət Komitəsinin nəzdində fəaliyyət göstərən Uşaq və Ailələrə Dəstək Mərkəzləri tərəfindən bölgələrdə müxtəlif tədbirlər baş tutub. Saatlı, Qəbələ, Şüvəlan, Zərdab, Hacıqabul, Goranboy, Göygöl UADM-lərin təşkilatçılığı ilə keçirilən tədbirlər çərçivəsində dəyirmi masa, rəsm və fotomüsabiqə keçirilib, məktəblilərin ifasında Vətən müharibəsi qəhrəmanlarının xatirəsinə həsr olunmuş bədii kompozisiya təqdim edilib, videoçarx nümayiş etdirilib, şəhidlərimizin ailə üzvləri ilə görüşlər təşkil olunub.
Tədbirlər Azərbaycan Respublikasının Dövlət Himninin səslənməsi ilə başlayıb və Vətən uğrunda canından keçmiş şəhidlərin əziz xatirəsi bir dəqiqəlik sükutla yad edilib. Qubadlı rayonunun işğaldan azad olunması uğrunda gedən döyüşlərdən, hərbiçilərimizin qəhrəmanlıqlarından danışılıb.
