Beynəlxalq Qızlar Günü münasibətilə fəal qızların Bahar Muradova ilə görüşü keçirilib

7 oktyabr 2022

Paylaş:

7 oktyabr 2022-ci il tarixində 11 Oktyabr - Beynəlxalq Qızlar Gününə həsr olunmuş kampaniya çərçivəsində Ailə, Qadın və Uşaq Problemləri üzrə Dövlət Komitəsinin sədri Bahar Muradovanın fəal qızlarla görüşü təşkil olunub.

Görüşdə həssas əhali qruplarından olan (şəhid övladları, əlilliyi olan, valideyn himayəsindən məhrum, internat məktəblərində təhsil alan) qızlar da daxil olmaqla, ümumilikdə 13-17 yaş arası 22 nəfər iştirak edib.

Qonaqları salamlayan Komitə sədri Bahar Muradova, görüş təşəbbüsünə görə təşkilatçılara, eləcə də bu yaşda ictimai fəallıq və vətəndaş mövqeyi nümayiş etdirdiklərinə görə iştirakçılara təşəkkür edib.

Bu gün Azərbaycan xalqının, xüsusilə qadınların, qızların həyatında əlamətdar hadisənin ildönümü olduğunu qeyd edən sədr, Zeynalabdin Tağıyevin təşəbbüsü ilə Bakıda yaradılan, müsəlman Şərqində ilk dünyəvi qızlar məktəbinin tarixindən bəhs edib. O əlavə edib ki, 2011-ci ildə Beynəlxalq Qızlar Gününün təsis olunması qızların bərabər iştirakçılığı və hüquqularının təmin olunması baxımından mühüm əhəmiyyətə malikdir.

Şəhid ailələrindən olan qızların da görüşdə iştirak etdiyini xatırladan B.Muradova, şəhidlərimizin xatirəsinə ehtiramını ifadə edib. Azərbaycanın işğal altında olan torpaqlarının igid oğulların cəsarəti və qəhrəmanlığı sayəsində azad edildiyini, şəhidlərimizin qanının yerdə qalmadığını və bu gün ölkəmizin quruculuq, yeni inkişaf dövrünə qədəm qoyduğunu vurğulayıb: “Bu gün Azərbaycan qürurlu, inkişaf etmiş, öz xalqına və vətəndaşlarına sahib çıxmağı bacaran ölkə kimi tanınır. Baxmayaraq ki, Ermənistan illərlə bizlə düşmənçilik edib, ancaq biz onlardan qisas almaq niyyətində deyilik. Qonşu ölkə kimi normal münasibətlərin formalaşdırılmasının, iqtisadi-humanitar əlaqələr qurulmasının tərəfdarıyıq. Biz qüdrətli ölkə kimi bunu etməyə hazırıq”.

Çıxışının davamında B.Muradova, uşaqların sağlam böyüməsi, inkişafı və təhsili, eləcə də hüquqlarının təmin olunması istiqamətində, eləcə də ölkənin bütün vətəndaşlarının rahat yaşayışını, rifahını, təhlükəsizliyini  təmin etmək məqsədilə dövlət və onun hər bir qurumu tərəfindən, eləcə də beynəlxalq təşkilatlarla birgə əməkdaşlıq çərçivəsində, müxtəlif layihələrin həyata keçirildiyini söyləyib.

"Regional İnkişaf” İctimai Birliyinin (RİİB) nümayəndəsi Zərifə Məmmədli Avropa İttifaqının (Aİ) maliyyə dəstəyi, BMT-nin Əhali Fondu (UNFPA) və BMT-nin Qadınlar üzrə Agentliyinin (UN Women) təşkilatçılığı ilə, RİİB tərəfindən icra edilən 11 Oktyabr - Beynəlxalq Qızlar Gününə həsr olunmuş kampaniya barədə məlumat verib. O, qızların erkən yaşlardan səlahiyyətləndirilməsi, onların özünəinam hissinin və ictimai fəallığının artırılmasına xidmət edən kampaniyanın məqsədinin, cəmiyyətdə qız uşaqlarının dəyərini təşviq etmək və onların öz potensiallarını reallaşdıra bilməsi üçün bərabər imkanların yaradılmasının əhəmiyyətini təbliğ etmək olduğunu qeyd edib.

Görüş, iştirakçıları maraqlandıran mövzular barədə müzakirə və səmimi söhbətlərlə davam edib. Sonda Komitə sədri qızların səsləndirdiyi fikirlərə münasibət  bildirərək, onlara öz tövsiyələrini verib.